Canada ram chung khuasa, CCFC chungtel Chin Khrifa buu kip nih atulio kan Kawlram ah ralhrang ralkap uknak chuh ruang ah harnak atong mi hna caah bomhnak kan ti khawh tawk in pek cio asi. Abikin kan Chin ram chung ah cozah riantuantu hna nih ralkap uknak tang ah cozah kan rian kan tuan kho loin ti in an rian an dinh tak tikah hlawh hmu ti loin an um caah anmah pawl bomhchanhnak caah ramkip khuasa Chin miphun hna nih ti khawh tawk chuah cio asi. Pumpak in siseh, Khrifa buu min in siseh, Community dirhmun zong in siseh alamkip in bomh chanhnak tuah cio asi.
CCFC chungtel hi Canada ram chung dihlak in Khrifa buu (12) kan si i avoikhatnak CDM bomhnak cu kan kuat ve cang. Atu hi avoihnihnak CDM Relief Fund kan thawh tthan lio asi. May thla chung ah kuat khawh ding in kan i zuam. Pumpak in siseh, CCFC chungtel asi lo nain hi CDM caah thawh kan duh ve ko atimi Khrifa buu dang nan um ahcun CCFC Executive Body riantuantu pakhat khat sin paoh ah pehtlaihnak tuah in pek khawh asi.
CDM Relief Fund timi cu Kawlram chung cozah riantuan ti loin ralhrang uknak duhlonak alanghter mi hna lawng bomhnak ding caah siloin ralhrang ralkap ruang ah harnak atongmi mipi vialte caah kholh mi asi. Khrifa buu riantuannak asi bantuk in hriamnam meithal cawknak ah hman ding siloin harnak atongmi mipi ca lawng ah kholh mi bomhnak phaisa asi.
Comments
Post a Comment